မြန်မာနိုင်ငံမှာ လူ့အခွင့်အရေး ကာကွယ်စောင့်ရှောက်သူ “Human Rights Defender” တွေကို အစိုးရက ရန်သူလိုသဘောထားလာတဲ့အပြင် အမြင်မတူသူတွေရဲ့ အသက်အန္တရာယ်အထိ ခြိမ်းခြောက်မှုတွေကိုပါ ခံလာရတဲ့ အခြေအနေတွေနဲ့ ကြုံတွေနေကြရပါတယ်။ ဒီ “လူ့အခွင့်အရေး ကာကွယ်စောင့်ရှောက်သူများ” အကြောင်းကိုတော့ လူ့အခွင့်အရေး ကာကွယ်စောင့်ရှောက်သူများဖိုရမ်က ဦးအောင်ဇော်ဦး၊ အသံ အဖွဲ့အစည်းက မောင်ဆောင်းခနှင့် လူ့အခွင့်အရေးနည်းပြကွန်ရက်က မသင်ဉ္ဇာခိုင်တို့ ဆွေးနွေးခဲ့ပါတယ်။
၇၁ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့ အကြိုအထိမ်းအမှတ်အနေဖြင့် လူ့အခွင့်အရေးဆွေးနွေးပွဲစကားဝိုင်းအစီအစဉ်ကို ညီမျှခြင်းမြန်မာနှင့် MCN သတင်းဌာနတို့က ပူးပေါင်းတင်ဆက်ပေးသွားဖို့ ၂၉ ရက်၊ နိုဝင်ဘာလ ၂၀၁၉ ခုနှစ်တွင် ရိုက်ကူးခဲ့ပါတယ်။ ယခု ၂၀၁၉ ခုနှစ်အတွက် ရွေးချယ်ထားသော ဆောင်ပုဒ်မှာ “လူသားအားလုံး အခွင့်အရေး လူငယ်များက ရပ်တည်ပေး” ၊“ Youth Standing Up for Human Rights” ဖြစ်ပါသည်။
၇၁ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့ အထိမ်းအမှတ်ကို ကြိုဆိုတဲ့အနေနဲ့ “တရားဥပဒေစိုးမိုးရေးနှင့် လူ့အခွင့်အရေး” ဆွေးနွေးပွဲစကားဝိုင်းအစီအစဉ်ကို ညီမျှခြင်း မြန်မာအဖွဲ့နဲ့ MCN သတင်းဌာနတို့က ပူးပေါင်း ထုတ်လွှင့်ခြင်းဖြစ်ပါတယ်။ “ တရားဥပဒေ စိုးမိုးရေး” ဆိုတာ “နိုင်ငံတွင် စိုးမိုးထားတဲ့ ဥပဒေတွေက တရားမျှတမှု ရှိရမယ်” လို့ ဆိုလိုကြောင်း၊ “ ပြည်သူလူထုအနေနဲ့ ရရှိခံစားခွင့်ရှိတဲ့ လူ့အခွင့်အရေး၊ ဥပဒေအခွင့်အရေး၊ နိုင်ငံသားအခွင့်အရေးတွေကို ပြည်သူလူထုကိုယ်တိုင် သိထားရမယ်” ဆိုတဲ့အကြောင်းတွေနဲ့အတူ လူ့အခွင့်အရေးနဲ့ တရားစီရင်ရေးက ဘယ်လိုဆက်စပ်နေလဲ၊ လူ့အခွင့်အရေးကို လေးစားတဲ့ တရားရေးမဏ္ဍိုင်ဖြစ်အောင် ဘာတွေပြောင်းလဲသင့်လဲ၊ တရားဥပဒေစိုးမိုးရေးနဲ့ လူ့အခွင့်အရေးလေးစားတဲ့ နိုင်ငံသားတစ်ယောက်အနေနဲ့ ဘာတာဝန်တွေ လိုက်နာသင့်သလဲ စတဲ့အကြောင်းအရာတွေကို ဆွေးနွေးပေးထားပါတယ်။
ညီမျှခြင်း မြန်မာ” သည် လူ့အခွင့်အရေး ပညာပေးအစီအစဉ်များ၊ လူ့အခွင့်အရေးချိုးဖောက်မှုများ ကို မှတ်တမ်းတင်ကာ တက်ကြွ လှုပ်ရှားသူများ၊ လူ့အခွင့် အရေး ကာကွယ်စောင့်ရှောက်သူများနှင့် ၎င်းတို့၏ မိသားစုများအတွက် အရေးပေါ် ပံ့ပိုး မှုများ ပံ့ပိုးပေးသည့် အစိုးရမဟုတ်သောအဖွဲ့အစည်း တခုဖြစ်သည်။ ထို့အပြင် ဒေသခံအရပ်ဘက်အဖွဲ့အစည်းများ၊ ပညာပေးသူများနှင့် လူ့အခွင့်အရေး တက်ကြွလှုပ်ရှားသူများ လည်းပါဝင်သည်။ ကျွန်ုပ်တို့၏ အစီအစဉ်များနှင့် လှုပ်ရှားမှု များသည် မြန်မာနိုင်ငံရှိ ပြည်နယ်နှင့် တိုင်းဒေသ ကြီးများ၌ ထိရောက်စွာ လှုပ်ရှားနိုင်ခဲ့သည်။
ညီမျှခြင်း မြန်မာသည် ၂၀၂၁ ခုနှစ် နိုင်ငံရေးအကြပ်အတည်းကြောင့် ဆိုးရွားသော အခြေအနေနှင့် ရင်ဆိုင်ခဲ့ရသော်လည်း ခိုင်မာသော လူ့အခွင့်အရေး ယုံကြည် ချက်ဖြင့် ရပ်တည်နေခဲ့သည်။