Archive for category: မာတီမီဒီယာ

မင်္ဂလာပါ “လူ့အခွင့်အရေးနှင့် ကျောင်းသင်ရိုးညွှန်းတမ်း” ဒုတိယပိုင်းကို လာမည့်အပတ်တွင် ထုတ်လွှင့်ပေး သွားမှာဖြစ်ပါသည်။ ဇာတ်လမ်းကို ကျောင်းသင်ရိုးညွှန်းတမ်းများတွင် လူ့အခွင့်အရေး အယူအဆသဘောတရားများ ပါဝင်ရေးနှင့် လူ့အခွင့်အရေး ပညာပေးခြင်းများအကြောင်းသိရှိစေရန်ရည်ရွယ်၍ ထုတ်လွှင့် ပြသ ခြင်းဖြစ်ပါသည်။ ဆရာအောင်ဇော်ထွေးမှ ကျောင်းသင်ခန်းစာများထဲမှ လူ့အခွင့်အရေးအကြောင်းအရာများကို လေ့လာခိုင်းရာ ထူးဝဏ္ဏရှိန်မှ သမိုင်းသင်ရိုးညွှန်တမ်းမှ တွေ့ရှိချက်ကိုဆွေးနွေးပြီး၊ နှင်းသီတာလှိုင် သည် မြန်မာစာသင်ရိုးညွှန်းတမ်းမှ တွေ့ရှိချက်ကို ဆွေးနွေးတင်ပြခဲ့ကြသည်။

မင်္ဂလာပါလို့ လူ့အခွင့်အရေး စကားသံမှ ပြန်လည် ကြိုဆိုပါသည်။
ထပ်မံထုတ်လွှင့်ပေးမည့်ခေါင်းစဉ်လေးက“စွန့်ပစ်ခံကလေးသူငယ်များ” ဖြစ်ပါသည်။ မြန်မာနိုင်ငံအတွင်းရှိ စွန့်ပစ်ခံကလေးငယ်များ၏ အခြေအနေ၊ အကြောင်းကို သိရှိစေရန် ရည်ရွယ်ပါသည်။

ဇာတ်လမ်းကို ပိုမိုနားလည်လွယ်ကူစေရန် အမှန်တကယ် မွေးကင်းစစွန့်ပစ်ကလေးငယ်များ ပြုစုစောင့်ရှောက် ပေးနေသူ ကိုဖိုးဇော်နှင့်တွေ့ဆုံကာ မေးမြန်းတင်ပြပေးထားပါသည်။

ဇာတ်လမ်းထဲမှ ကိုနေလသည် ဂျာနယ်ထဲတွင် ကလေးငယ်ကို စွန့်ပစ်ခဲ့သောသတင်းကို ကြားပြီး ဒေါသထွက် ခဲ့ရသည်။ ထိုအချိန်မှာ သူငယ်ချင်းဖြစ်သူ လွှမ်းမိုးအောင်မှ အကြောင်းစုံ သိရှိစေရန် ဆရာအောင်မျိုးမင်းထံ သွားရောက် မေးမြန်းဖို့ အကြံပြုခဲ့သည်။

ထိုမှတဆင့် ဆရာအောင်မျိုးမင်းနှင့်အတူ ကိုနေလ၊ ကိုလွှမ်းမိုးအောင်၊ မဖွေးဖွေးဝင်းတို့သည် မွေးကင်းစ စွန့်ပစ်ကလေးငယ်များ ပြုစုစောင့်ရှောက် သူထံသွားပြီးမေးမြန်းခဲ့ကြသည်။ ကိုဖိုးဇော်အား မည်သည့်အချိန် ကစပြီး ထိုအလုပ်ကို စလုပ်ဖြစ်ခဲ့ပုံ၊ တွေ့ကြုံရသည့် အခက်အခဲများ၊ မည်သို့ပြုစုစောင့်ရှောက်ရပုံ၊ အမှတ်ရ စရာအဖြစ်အပျက် စသည်တို့ကိုမေးမြန်းခဲ့သည်။

ကလေးငယ်များအား စွန့်ပစ်ခြင်းမရှိစေရန် မည်ကဲ့သို့ လုပ်ဆောင်ရမည်နည်း၊ မည်သူတွေမှာ တာဝန်ရှိသည်ကို ရှင်းလင်းပေးထားသည့် ဇာတ်လမ်းဖြစ်ပါသည်။

ညီမျှခြင်း မြန်မာအဖွဲ့ အမှုဆောင်ဒါရိုက်တာ ဆရာဦးအောင်မျိုးမင်း၊ ကိုနေလ၊ မဖွေးဖွေးဝင်း၊ ကိုလွှမ်းမိုးအောင်နှင့် မွေးကင်းစစွန့်ပစ်ကလေး ငယ်များ ပြုစုစောင့်ရှောက် ပေးနေသူ ကိုဖိုးဇော်တို့က ပါဝင် သရုပ်ဆောင်ထားပါသည်။

မင်္ဂလာပါ လူ့အခွင့်အရေးစကားသံမှ ပြန်လည်ကြိုဆိုနှုတ်ခွန်းဆက်သလိုက်ပါတယ်။

မြန်မာနိုင်ငံ ကလေးအလုပ်သမားတွေထဲက အိမ်အကူကလေးအလုပ်သမားတွေ အကြောင်းသိရှိစေရန် ရည်ရွယ်ပြီး“ကလေးနှင့်အလုပ်” ဇာတ်လမ်းကို DVB ရုပ်သံမှ ထုတ်လွှင့်ပြသသွားမှာဖြစ်ပါတယ်။

ကလေးအလုပ်သမားအကြောင်းရိုက်ကူးထားတဲ့ သီချင်းလေးကို သင်တန်းတစ်ခုတွင် ပြသပေးတယ်။ သီချင်းမှာပါဝင်သရုပ်ဆောင်နေတဲ့ ကလေးအလုပ်သမားတွေ ဘဝကို ကြည့်ပြီး သင်တန်းသားတွေရဲ့ခံစားချက်နှင့် အကြောင်းအရာတွေကို ညီမျှခြင်းမြန်မာအဖွဲ့ အမှုဆောင်ဒါရိုက်တာ ဆရာဦးအောင်မျိုးမင်းက မေးမြန်းဆွေးနွေးပေးထားတယ်။

ဆက်ပြီး ကလေးအလုပ်သမားတွေထဲက အိမ်အကူ ကလေးအလုပ်သမားတွေအကြောင်း အဓိက ဆွေးနွေးထားပြီး၊ ကလေးအလုပ်သမားဘာကြာင့်များပြားနေရလဲဆိုတာကို ဆရာအောင်မျိုးမင်းက အကြောင်းအရင်းလေးတွေကို တင်ပြပေးထားတဲ့ ပညာပေး ဇာတ်လမ်းလေးဖြစ်ပါတယ်။

ဒီအပတ်မှာတော့ အကျဉ်းထောင်မှာ ဘယ်လိုဥပဒေ တွေရှိပြီး၊ အကျဉ်းသားတွေမှာရော ဘယ်လိုအခွင့်အရေးတွေရှိနေသလဲဆိုတာကို ညီမျှခြင်းမြန်မာအဖွဲ့နှင့် DVB ရုပ်သံတို့ပူးပေါင်းပြီး တင်ဆက်ပေးသွားမှာဖြစ်ပါတယ်။

ဒီဇာတ်လမ်းကို မြန်မာနိုင်ငံရှိ အကျဉ်းထောင်ဥပဒေ (မူကြမ်း)နှင့် အကျဉ်းသားအခွင့်အရေးကိုသိရှိစေရန် ရည်ရွယ်ပြီး ထုတ်လွှင့်ပြသခြင်းဖြစ်ပါတယ်။

လွယ်ကူရှင်းလင်း၊ နားလည်သဘောပေါက်စေဖို့ တပည့်များက ဆရာကို မေးမြန်း၊ ဆွေးနွေးရုံသာမက မြန်မာနိုင်ငံက အကျဉ်းသားအခွင့်အရေးတွေနဲ့ပတ်သက်ပြီး ကူညီလုပ်ဆောင်နေတဲ့ နိုင်ငံရေးအကျဉ်းသားများ ကူညီစောင့်ရှောက် ရေးအသင်းသို့ သွားရောက်လေ့လာခဲ့ကြတယ်။

နိုင်ငံရေးအကျဉ်းသားများကူညီစောင့်ရှောက်ရေးအသင်း၊ မှတ်တမ်းနှင့်သုတေသနတာဝန်ခံ ကိုဇော်မိုးက လွှတ်တော်မှာ တင်သွင်းထားတဲ့ အကျဉ်းထောင်ဥပဒေမူကြမ်းနဲ့ အကျဉ်းသားအခွင့်အရေးတို့ကို ရှင်းလင်းပေးခဲ့ပြီး၊ အပြန်အလှန်မေးမြန်း ဆွေးနွေးကြခဲ့တယ်။

ဆက်ပြီး ဆက်ရန်နိုင်၊ ယွန်းပိုပိုအောင်၊ လွှမ်းမိုးအောင်တို့လည်း အဲဒီအသင်းက နိုင်ငံရေးအကျဉ်းသူဖြစ်သူ မသန်းသန်းဌေးကို သူမထောင်ကျခဲ့တဲ့အဖြစ်အပျက်၊ ထောင်တွင်းမှလူ့အခွင့်အရေးချိုးဖောက်မှုများအကြောင်းမေးမြန်းခွင့်လည်း ရခဲ့ကြတယ်။

ညီမျှခြင်း မြန်မာအဖွဲ့ အမှုဆောင်ဒါရိုက်တာ ဆရာဦးအောင်မျိုးမင်း၊ တပည့်များဖြစ်ကြတဲ့ ဆက်ရန်နိုင်၊ ယွန်းပိုပိုအောင်၊ လွှမ်းမိုးအောင်၊ မသန်းသန်းဌေး (နိုင်ငံရေးအကျဉ်းသူဟောင်း)၊ ကိုဇော်မိုး(နိုင်ငံရေးအကျဉ်းသားများကူညီ စောင့်ရှောက်ရေးအသင်း၊ မှတ်တမ်းနှင့်သုတေသနတာဝန်ခံ)တို့က ပါဝင်သရုပ်ဆောင် ထားပါတယ်။