Myanmar Imperial University သို့ အိပ်ဖွင့်ပေးစာ
BY EQUALITY MYANMAR ON JULY 23, 2019
ဇူလိုင်လ ၂၂ ရက် ၂၀၁၉ ခုနှစ်
သို့
အုပ်ချုပ်ရေးအဖွဲ့
Myanmar Imperial University
No.1, Zay Mauk Street, Dagon Township, Yangon
အကြောင်းအရာ။ ကျောင်း၏ဝန်ထမ်းတဦးဖြစ်သော ကိုကျော်ဇင်ဝင်း အဆုံးစီရင်မှုအတွက် နောက်ဆက်တွဲ စုံစမ်းလုပ်ဆောင်ချက်များကို အများသိစေရန်အတွက် ထုတ်ပြန်ပေးရန် ပန်ကြားခြင်း
မိမိတို့သည် လွန်ခဲ့သော ဇွန်လ (၂၄) ရက် ၂၀၁၉ ခုနှစ်က မိမိကိုယ်ကို မိမိသတ်သေသွားသည့် Myanmar Imperial University မှ စာကြည့်တိုက်မှူးဖြစ်ခဲ့သူ ကိုကျော်ဇင်ဝင်းသေဆုံးမှုအတွက် တရားမှုတရေးကို အစဉ်အဆက်တောင်းဆိုနေသော LGBT အဖွဲ့အစည်းများဖြစ်ပါသည်။ လုပ်ငန်းခွင်အတွင်း လိင်စိတ်ဝိသေသ ကွဲပြားမှုကို[H1] အဓမ္မဖော်ထုတ်ခံခဲ့ရပြီး နိုင်ထက်စီးနင်းပြုကျင့်ခံခဲ့ရသော ကိုကျော်ဇင်ဝင်းအတွက် တရားမျှတမှုကို စုပေါင်းတောင်းဆိုခြင်း ထုတ်ပြန်ကြေညာချက်ကို အဖွဲ့အစည်းပေါင်းတရာကျော်က ဇွန်လ (၂၅) ရက်နေ့တွင် ထုတ်ပြန်ခဲ့သော အဖွဲ့အစည်းများဖြစ်ပါသည်။ ထိုထုတ်ပြန်ကြေညာချက်ထဲတွင် ကိုကျော်ဇင်ဝင်း၏ အဆုံးစီရင် မှုအတွက် လွန်စွာဝမ်းနည်းကြေကွဲရကြောင်းကိုဖော်ပြခဲ့ြ့ပီး အခင်းဖြစ်ပွားအောင် အားပေးအားမြှောက်ပြုခဲ့သူ များနှင့် ၎င်း၏ လိင်စိတ်တိမ်းညွတ်မှုကို ဖွင့်ဟစေရန်နှင့် လုပ်ငန်းခွင်အတွင်းအနိင်ကျင့်ခြင်းဖြင့် အကြမ်းဖက်မှု ကို အခွင့်ပေးထားသော Myanmar Imperial University နှင့် ၎င်း၏ စီမံခန့်ခွဲမှုရေးရာတာဝန်ရှိသူများကို ပြင်းထန်စွာ ရူတ်ချကြောင်း ဖော်ပြထားပါသည်။ ထို့သို့ လုပ်ဆောင်မှုသည် လူ့အခွင့်အရေးချိုးဖောက်မှု ဖြစ်ကြောင်း မိမိတို့ ယုံကြည်သည့်အားလျော်စွာ ထိုအခင်းဖြစ်ပွားအောင် အားပေးအားမြှောက်ပြုခဲ့သူများနှင့် ကျူးလွန်ခဲ့သူများကို အရပ်သားဖြစ်စေ နှင့်/သို့မဟုတ် ရာဇဝတ်မှုအားဖြင့်ဖြစ်စေ ချက်ချင်းအရေးယူဆောင် ရွက်ပေးရန်နှင့် တက္ကသိုလ်အနေဖြင့် နောက်နောင်တွင် အလားတူဖြစ်ရပ်မျိုးဖြစ်ပွားခြင်းမှကာကွယ်ရန် လူထုရှေ့မှောက်တွင် တရားဝင်တောင်းပန်ချက်များ၊ ပွင့်လင်းမြင်သာသော အရေးယူဆောင်ရွက်ချက်များ ကို ဆောင်ရွက်သွားရန် အထူးတောင်းဆိုခဲ့ပါသည်။ ထိုကိစ္စနှင့် ပတ်သက်၍ တက္ကသိုလ်ကျောင်းမှ ဇူလိုင်လ (၂) ရက်နေ့ နေ့စွဲဖြင့် ထုတ်ပြန်ခဲ့သော ထုတ်ပြန်ချက်တွင် ကိုကျော်ဇင်ဝင်းသေဆုံးမှုနှင့်ပတ်သက်၍ မြန်မာနိုင်ငံအမျိုးသားလူ့အခွင့်အရေးကော်မရှင်က စုံစမ်းစစ်ဆေးမှုများ စတင်ပြုလုပ်နေပြီဖြစ်ကြောင်းနှင့် အမှန်တရားအမြန်ဆုံးပေါ်ပေါက်စေရန်နှင့် ဥပဒေဘောင်အတွင်းမှ တရားစီရင်မှုပြုလုပ်နိုင်ရန်အတွက် မြန်မာနိုင်ငံရဲတပ်ဖွဲ့အပါအဝင် မည်သူမဆို ပူးပေါင်းဆောင်ရွက်သွားမည်ဖြစ်ကြောင်း ရေးသားဖော်ပြခဲ့ပါသည်။
လာမည့် ဇူလိုင်လ (၂၄) ရက်နေ့တွင် ကိုကျော်ဇင်ဝင်းအဆုံးစီရင်ခဲ့သည့်နေ့ တလတိတိပြည့်မြောက်ပြီ ဖြစ်ပါသည်။ အဆုံးစီရင်ခဲ့သည့် တလပြည့်မြောက်ခဲ့သော်လည်း စုံစမ်းစစ်ဆေးအရေးယူမှုများနှင့်ပတ်သက်၍ တိကျခိုင်လုံသော သတင်းအချက်အလက်များကို Myanmar Imperial University မှ တာဝန်ရှိသူများက ဆက်လက်ထုတ်ပြန်ခြင်းမရှိတော့သည်ကို တွေ့ရှိရပါသည်။ ကျူးလွန်ရာတွင် ပါဝင်သည်ဟု ယူဆရသည့် သူများကို မည်ကဲ့သို့အရေးယူထားကြောင်း၊ လက်ရှိ စုံစမ်းစစ်ဆေး မှုများ မည်သည့် အခြေအနေသို့ ရောက်ရှိနေကြောင်း၊ နောက်နောင်တွင် အလားတူဝမ်းနည်းဖွယ်ဖြစ်ရပ်များ ထပ်မံ မဖြစ်ပွားအောင် မည်ကဲ့သို့လုပ်ဆောင်နေကြောင်းတို့ကို ပွင့်လင်းမြင်သားစွာ ထုတ်ပြန်ခြင်းမရှိတော့သည်ကို မိမိတို့ စိုးရိမ်မိသည်။
မိမိတို့သည် ကိုကျော်ဇင်ဝင်းအမှုနှင့် ပတ်သက်၍ အမှန်တရားဖော်ထုတ်ပြီး တာဝန်ရှိသူများကို အရေးယူနိုင် သည်အထိ ဆက်လက်ကြိုးပမ်းလုပ်ဆောင်သွားရန် သံဓိဌာန်ချထားသူများဖြစ်သည်။ ထို့ကြောင့် ထိုအမှုနှင့် ပတ်သက်၍ နောက်ဆက်တွဲလုပ်ဆောင်ချက်များနှင့် ရလာဒ်များကို စိတ်ဝင်စားစွာစောင့်ကြည့်လေ့လာလျက်ရှိ ပါသည်။ မိမိတို့အနေဖြင့် ကိုကျော်ဇင်ဝင်းအမှုနှင့်ပတ်သက်၍ စုံစမ်းစစ်ဆေးမှုအခြေအနေများ၊ အမှန်တရား ဖော်ထုတ်မှုအခြေအနေများကို အခြားပြည်သူများနည်းတူ အချိန်နှင့် တပြေးညီ သိရှိလိုပါသည်။
ထို့အတွက်ကြောင့် Myanmar Imperial University အနေဖြင့် ကိုကျော်ဇင်ဝင်းအမှုနှင့် ပတ်သက်သည့် စုံစမ်းစစ်ဆေးခြင်းလုပ်ငန်းများနှင့် အရေးယူဆောင်ရွက်မှုများကို အများသိစေရန်အတွက် ပွင့်လင်းမြင်သာစွာ ထုတ်ပြန်ပေးရန် တိုက်တွန်းလိုက်ပါသည်။ မိမိတို့အနေဖြင့် အမှုမှန်ပေါ်ပေါက်ပြီး မှန်ကန်သည့် တရားဥပဒေ ကို ဆောင်ကျဉ်းနိုင်သည့်အထိ ဆက်လက်ကြိုးပမ်းလုပ်ဆောင်သွားမည်ဖြစ်ကြောင်းကို လေးနက်စွာ အသိပေးအပ်ပါသည်။
လေးစားစွာဖြင့်
LGBT အဖွဲ့များကိုယ်စား
အောင်မျိုးမင်း
Executive Director
Equality Myanmar
၀၉ ၄၄၈၀၁၅၃၀၆
myominburma@gmail.com
ဒေါက်တာ ပြည့်စုံဟိန်း
Executive Director
CAN Myanamar
၀၉၇၆၆၆၅၀၆၂၄
canorg.director@gmail.com
ကိုအောင်ဖြူထွဋ်
Senior Operation Officer
Myanmar Youth Stars
၀၉ ၉၆၄၇၈၉၇၉၉
aungphyuhtut90@gmail.com
ကိုလှမြတ်ထွန်း
Deputy Director
Colors Rainbow
Hlamyat.crb@gmail.com
