လူ့အခွင့်အရေးပညာပေးသူများကွန်ယက်
နေ့စွဲ ဇူလိုင် ၂၂ ရက် ၂၀၁၅ ခုနှစ်
သတင်းထုတ်ပြန်ချက်
မြန်မာနိုင်ငံအတွင်းရှိ လူ့အခွင့်အရေးပညာပေးသူများ စုစည်းညီညွတ်စွာဖြင့် လူ့အခွင့်အရေးပညာပေးလုပ်ငန်း များကို ပိုမိုထိရောက်စွာ လုပ်ဆောင်သွားနိုင်ရန်နှင့် အစိုးရအနေဖြင့် ကျောင်းသင်ခန်းစာများမှတဆင့် လူ့အခွင့် အရေးသင်ကြားမှုများ လုပ်ဆောင်လာအောင် လှုံ့ဆော်သွားနိုင်ရန်အတွက် မြန်မာနိုင်ငံတွင် ပထမဦးဆုံးသော “လူ့အခွင့်အရေးပညာပေးသူများကွန်ယက် – Human Rights Educators’ Network (HREN)”ကို ဇူလိုင်လ (၁၆) ၇က်နေ့တွင် ဖွဲ့စည်းလိုက်ပြီဖြစ်သည်။
ထိုကွန်ယက်ကို ပြည်နယ်နှင့်တိုင်းအသီးသီးရှိ အဖွဲ့ပေါင်း (၄၅) ဖွဲ့မှ လူ့အခွင့်အရေးပညာပေးမှုလုပ်ဆောင်နေ သည့် ပညာပေးသူ (၇၀) ကျော်တက်ရောက်ပါဝင်ဆွေးနွေးခဲ့သော လူ့အခွင့်အရေးပညာပေး ဖိုရမ်အပြီးတွင် ဖွဲ့စည်းလိုက်ခြင်းဖြစ်သည်။ ညီမျှခြင်းမြန်မာ (Equality Myanmar) က ကြီးမှူးကျင်းပ၍ နှစ်ရက်တာကျင်းပ ခဲ့သော ဖိုရမ်အတွင်း မြန်မာနိုင်ငံအတွင်း နေရာဒေသအသီးသီး၌ လူ့အခွင့်အရေးကို နည်းမျိုးစုံဖြင့် ပညာပေး နေကြသောသူများ၏ အခြေအနေများ၊ စိမ်ခေါ်မှုများကို တင်ပြဆွေးနွေးခဲ့ကြသည်။ ထို့အပြင် လူ့အခွင့်အရေး ပညာပေးသူများအကြား အရည်အချင်းတိုးတက်အောင်လုပ်ဆောင်နိုင်ရန်၊ ပိုမို ပူးပေါင်းချိတ်ဆက်မှုရှိသော ယန္တယားကို ထူထောင်ပြီး လုပ်ငန်းများကို ဆက်စပ်လုပ်ဆောင်ရန်၊ လူ့အခွင့် အရေးပညာပေးမှုကို အစိုးရ ထိရောက်စွာလုပ်ဆောင်နိုင်ရေးအတွက် စည်းရုံးလံ့ှုဆော်သွားရန် ဆုံးဖြတ်ခဲ့ကြသည်။
ထိုဖိုရမ်၏ ရလာဒ်အနေဖြင့် ဖွဲ့စည်းလိုက်သော လူ့အခွင့်အရေးပညာပေးသူများကွန်ယက်သည် “လူ့အခွင့် အရေးပညာပေးခြင်းအား သင်ရိုးညွန်းတမ်းဖြင့် သင်ကြားခြင်းအပါအဝင် အခြားနည်းလမ်းမျိုးစုံဖြင့် အစိုးရနှင့် လူမှုအဖွဲ့အစည်းများက စနစ်တကျလုပ်ဆောင်နိုင်ပြီး ပြည်သူလူထုတိုင်းက လူ့အခွင့်အရေးယဉ်ကျေးမှုကို သိရှိနားလည်ပြီး လေးစားလိုက်နာကျင့်သုံးသည့် လူမှုအသိုင်းအဝိုင်းတစ်ခုကို ဖန်တီးရန်” မျှော်မှန်းပါသည်။
ကွန်ယက်အနေဖြင့် အရည်အချင်းပြည့်ဝသော လူ့အခွင့်အရေးပညာပေးသူများကို လေ့ကျင့်ပေးပြီး ထိုသူများ အကြား သတင်းဗဟုသုတများကို စဉ်ဆက်မပြတ်ဖလှယ်ပေး၍ စွမ်းရည်မြှင့်တင်ရန်၊ လူ့အခွင့်အရေးပညာပေး ခြင်းကို တစ်နိုင်ငံလုံးအတိုင်းအတာဖြင့် ထိရောက်စွာလုပ်ဆောင်ရန်၊ အစိုးရနှင့် အစိုးရမဟုတ်သော အဖွဲ့များ အနေဖြင့် လူ့အခွင့်အရေးတာဝန်ယူမှု၊ တာဝန်ခံမှုများ အားကောင်းလာစေရန်အတွက် တောင်းဆိုလှုပ်ရှားမှုများ အား ပံ့ပိုးကူညီရန်၊ အစိုးရအနေဖြင့် လူ့အခွင့်အရေးပညာပေးခြင်းကို ကျောင်းသင်ရိုးညွန်းတမ်းများနှင့် နိုင်ငံပိုင် မီဒီယာများမှတဆင့် ထိရောက်စွာလုပ်ဆောင်နိုင်အောင် လှုံ့ဆော်ရန်စသည့် ရည်ရွယ်ချက်လေးခုကို ချမှတ် ထားပါသည်။
ကွန်ယက်အနေဖြင့် လူ့အခွင့်အရေးပညာပေးနည်းပြသင်တန်းများ၊ မွန်းမံသင်တန်းများကို ဖွင့်လှစ်ပြီး ပြည်နယ် နှင့်တိုင်းများမှ လူ့အခွင့်အရေးလေ့လာလုပ်ဆောင်လိုသူများကို ဖိတ်ခေါ် လေ့ကျင့်သွားမည်ဖြစ်ပါသည်။ ထို့ပြင် လူ့အခွင့်အရေးဆိုင်ရာ စည်းရုံးလှုံ့ဆော်မှုများကို အခြားသော အရပ်ဘက်လူမှုအဖွဲ့အစည်းများနှင့် လက်တွဲ လုပ်ဆောင်သွားမည်ဖြစ်ပါသည်။
အသေးစိတ်သိရှိလိုပါက ဦးအောင်မျိုးမင်း၊ ဒါရိုက်တာ၊ (Equality Myanmar) ဖုန်း ၀၉ ၄၄၈၀၁၅၃၀၆ သို့ဆက်သွယ်မေးမြန်းနိုင်ပါသည်။
